والداك.... (وبالوالدين إحسانا) صدق الله العظيم

أفضل الكتابة بالعامية عشان يفهمني الكل
بعد خطبة الجمعة أمس، وكانت عن عقوق الوالدين. خطر في بالي انقل لكم هذي القصة.
القصة سمعتها من والدتي واهي سمعتها في برنامج على تلفزيون الكويت من فترة بعيدة.. مو شي يديد يعني. المهم
القصة نقلت في التلفزيون وكتبوها في الجرائد حسب ما عرفت من الوالدة

هذا الشخص وجزاه الله خير دنيا وآخرة، يتسوق مع أهله
واحد من المحلات اللي دخلوها لاحظ على الباب سيدة كبيرة في السن واقفة عند الباب
"ممكن الواحد يلاحظ شي نفس هذا لكنه يمر عليه عادي جدا لان مو ملفت بشكل كبير"
المهم بعد ما خلصو من السوق ورجعو البيت، اكتشف ان بعض الملابس تحتاج تبديل لسبب من الاسباب، قرر يرجع المحل مرة ثانية بدال ما يأجل الموضوع ليوم ثاني.
(( ارجو تتخيلون المدة من وقت ما شاف اللي واقفة على الباب لين رجع البيت لين رجع المحل مرة ثانية ))
لما رجع المحل لاحظ ان السيدة الكبيرة لازالت واقفة عند المحل
سألها: عسى ما شر شفتج من مدة واقفة هني. اساعدج بشي؟
قالت: لا انا ياية السوق مع ابني،،، ماخذني يشتريلي.
سألها: زين وينه؟؟
قالت: اهو قالي نطريني هني بس بمر صديقي قريب من هالمكان باخذ منه شغله ضرورية وارجع،،،، وترك معاي هذي الورقة.... ( ملاحظة. ما تعرف تقرأ )
جزاه الله خير الرجل اخذ الورقة وشنو اللي شافه !!!!

(( أرجو من اللي يلاقي هذه السيدة ويقرأ هذه الرسالة أن يأخذها إلى دار العجزة ))

جزاه الله خير هذا الشخص.. قال للمرأة، يا يمه تعالي معاي آخذك بيتي هناك زوجتي وعيالي
ما قدر يقولها شنو كاتب ((ابنها)) في الورقة.
قالت: شلون ايي معاك؟؟؟ انا ناطرة ولدي.
اضطر آسفا يقولها اللي كتبه ((ابنها)) في الورقة
وقتها قالت له... خلاص. ودني مثل ما قال ولدي
حاول انه يقنعها حاول يغير رايها لكن رفضت إلا تروح مثل ما طلب ولدها
وفعلا راحت.. وبعد مدة توفت في ذاك المكان الموحش.

بالذمة منو فيكم ما انقبض صدره عليه وخنقته عبرته؟؟
شلون في قلوب بالقسوة هذي؟؟ وعلى منو يا ح؟؟ر. ترى مكان العلامات مو حرف ميم وألف.
نسيت شنو سوت معاك وانت صغير؟؟ نسيت لما كنت توصخ تحتك واهي تنظفك؟؟
نسيت لما كنت توصخ عليها يا ح؟؟ر وتنظفك وعلى قلبها مثل الشهد؟؟
شي غريب.. تتعب معاك كل التعب وما تقول غير يا رب عطه العافية وطول بعمره
والبعض يتعب مع والديه وفي قلبه يقول.. ليت يموت او تموت وارتاح

ما راح اوصي ولا راح اقول شي غايب عنكم.. فيكم البركة
بس ودي اقول لازم نعطي اكثر،، كثر ما نقدر،، ولا راح نوفي دينهم

واختم كلامي بالآية العظيمة الكريمة

أعوذ بالله من الشيطان الرجيموَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَاناً إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَا أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيماً (23) وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيراً (24)
سورة الإسراء

ودمتم في حفظ الله