الجميع مسؤول عن رعيته...

بسم الله الرحمن الرحيم


اخواني اخواتي.. السلام عليكم ورحمة الله وبركاته
المحبوب2007 يحييكم ويتمنى لكم رحلة كلها خير مع الموضوع التالي.


دخلت ،،، سلمت ،،، جلست ،،، شربت ،،، الحمد لله
ما اشوف إلا هالفطفوط هاللي داش علينا ما شاء الله
قعد يمي عجبني شكله ظريف ولطيف
راس بني آدم بس الشعر فوقه مثل عرف الديك.. من القصات الغريبة العجيبة اللي طالعة هالايام
تعال حبيبي شسمك؟؟ كذا
جم عمرك؟؟ 7
شنو هالشعر هذا؟؟ منو مسويلك جذي؟؟
رد وقال... أبوي
حلووو حلووو يا سلام يا سلام يا عيني يا عيني على ابوك
اكيد انتو الحين بتقولون توه صغير وعادي او خليني اقول البعض منكم
لكن انا سبقت الاحداث وشرهت على طول لان اللي صار بعدها اثبت ان موضوع القصة هذي
في بعده لبس و و و و و و الخ

شلون المدرسة حبيبي؟؟ يرد ويقول تمام
شنو تحب؟؟ احب كذا وكذا وكذا وكذا... جميل ظريف
حافظ الفاتحة؟؟
يعني شنو الفاتحة؟؟
يعني الحمد لله رب العالمين...
اي حافظها وسمع بس بتكسير في الحروف، ميخالف المهم حافظ شوي شوي يتعدل
زين حبيبي حافظ الاخلاص؟؟ يعني قل هو الله احد؟؟
ناسيها
زين إنا اعطيناك الكوثر؟؟
لا
زين حافظ إذا جاء نصر الله والفتح؟؟
اي بس ما اعرف اقول
حبيبي ما علمك بابا... "اقصد دادي" ما علمك تصلي؟؟
يضحك ويقول اي... اكيد تعليم بسيط مافيه حرص والدليل واضح

في نفس السن هذا وأقل.. لو نسأله شنو اسم اول اغنية غناها فلان وشنو كلماتها
وكم مرة غناها وفي اي يوم وتاريخ حطوها فيديو كليب وعلى اي قناة ؟؟ راح يجاوب.
يعني قادر على الحفظ وذاكرته قوية لكن الشرهة مو عليه اهو.. الشرهة على من رباه وخلاه جذي. ما اظلم وقول كل الآباء والأمهات من هالنوع لان في من يطلع عاق حتى لو ربوه احسن تربية
لكن من صغره؟؟ مستحيل يكون منه لان والديه ماسكينه مسيطرين عليه ويربونه (المفروض)
مهتم بالجينز اللي ما يدش بالجسم الا حاط دهن ومهتم بقصة الشعر اللي جنها عرف ديك
ويتربى الولد على السخافات وحب الشهوات وشغل الوقت بكل ماهو تافه

مع الاسف الشديد.. البعد عن الدين واخلاقنا العربية الاصيلة ما عاد بس في البيوت
حتى في المدارس.. نلاحظ حصة الدين صارت اهون الحصص، ويخلونها آخر حصة
يعني في الوقت اللي يكون الطالب فيه رايح فيها ما يبي غير يرجع البيت ياكل وينام
منين بيصير له خلق يفهم؟؟ سبحان الله ولا حول ولا قوة الا بالله.

كثر ما نبعد عن دينا وقيمنا وعاداتنا كثر ما نضيع ويعم الفساد وتكثر المشاكل
لكل اب وام اقول
علم ابنك طريق الصلاح
علم ابنك قرآن
علم ابنك قيم واخلاق من سيرة الرسول عليه وعلى آله الصلاة والسلام
علمه من مناقب أصحاب الرسول، خله (( رجل )) بمعنى الكلمة. يتحمل مسئولية نفسه وبيته مستقبلا
مو انسان لا قيمة ولا فايدة ولا غارية على اهله حتى.

تذكر انك في يوم راح تموت وراح تنسئل.. ( انت مسئول عن رعيتك )
طيب على الاقل فكر في اليوم اللي ينقطع كل عملك ولا يظل غير صدقة جارية او علم ينتفع به او ولد صالح يدعو لك.
ولدك هذا بيدعي شيقول بالله عليك؟؟؟؟ القلب المحتاس عذب وايد ناس؟؟
ولا بيقول يا لابس الكفن الابيض واسمك يا حلو مافيه نقطة؟؟

الله يهدينا ويهدي كل الناس لكل خير وكل صلاح وللطريق المستقيم
طولت عليكم... يعطيكم العافية

دمتم في حفظ الله